Jodi
Jantjies

Jodi Jantjies, ’n boorling van Mitchells Plain in die Wes-Kaap, is 'n Sama-genomineerde sanger/liedjieskrywer en een van ATKV-Crescendo se grootste suksesverhale.

 

Sy kom uit ’n musikale gesin, dis nie altemit nie. Sy en haar tweelingsussie Jade sing en speel in die orkes van haar ma se kerk. Haar boetie Andrew is ’n professionele sanger wat in hotelle dwarsoor Spanje optree.

 

Jodi se musikale loopbaan was nie sonder struikelblokke nie. Van kleins af het sy 'n probleem met hakkel gehad. Die een oomblik praat sy en die volgende oomblik is dit asof haar tong aan haar verhemelte klou. Snaaks genoeg het sy nooit enige probleme ervaar wanneer sy sing nie – dan kom die woorde seepglad uit.

 

Op 4 Maart 2016 waag sy as ’n skaam sestienjarige om haar eie liedjie voor ’n paneel beoordelaars te sing. Mynie Grové, HemelBesem, Danie du Toit en Anna Davel was al vier dit eens dat Jodi ’n pad saam met ATKV-Crescendo se mentors moet stap.

 

Oor die afgelope aantal jaar het Jodi met die hulp van die ATKV-Crescendo Mentorskapprogram haar eie musikale styl ontwikkel – diep, sielvolle musiek wat ’n mengsel van jazz, gospel en soul is. Alhoewel sy in Afrikaans en Engels sing, konsentreer sy op die oomblik om haar Afrikaanse erfenis te ontgin. Suid-Afrikaanse gehore het intussen al die voorreg gehad om Jodi saam met die ATKV-Crescendo-span tydens verhoogproduksies by onder andere Aardklop, Suidoosterfees en #OnseFees.

 

Die uitreiking van haar debuutalbum Woorde in Oktober 2021 was ’n lewenslange droom wat waar geword het. Die liedjie Gee my die woorde neem sy op saam met Afrikaanse rock-ikoon Karen Zoid.

 

Jode se harde werk gaan nie ongesiens verby nie. In 2022 ontvang sy nie net ’n Sama-nominasie vir beste kontemporêre musiekalbum nie, maar kry sy ook nominasies in PretoriaFM se Aitsa-musiektoekennings vir beste nuweling beste gospelliedjie van die jaar.

 

Dit is duidelik dat Jodi se musikale reis saam met ATKV-Crescendo haar getransformeer het van ’n skaam, stil meisie tot ’n storieverteller wat met selfvertroue deur musiek haar verhaal kan vertel.