Lucia se enkelsnit "Hou van jou" nou landswyd op radiostasies te hoor

Die pragtige en talentvolle sangeres en liedjieskrywer, Lucia van Pretoria, stel haar nuutste enkelsnit, “Hou van jou”, bekend. Die opgewekte snit dra ’n universele boodskap: jy kan selfs van iemand hou sonder om dit ooit hardop te sê. Soms hou die geheim die misterie lewendig totdat die vlammetjie uitdoof of die liefde wel ontkiem.

As ’n gewilde ATKV-Crescendo-kunstenaar het Lucia vroeër vanjaar haar debuutalbum, As jy val, by die Daisy Jones-teater buite Stellenbosch vrygestel. Al vier die snitte – almal uit haar eie pen en deur Crescendo Musiek vervaardig – is daarna op digitale platforms vrygestel. “Hou van jou” is die tweede snit wat op radiostasies landswyd te hoor gaan wees en het volgens Lucia ’n ligter melodieuse aanslag as die temalied, “As jy val”.

“In die stilte sal ek van jou hou, tot jou glimlag my onthou. Weet dat ek vir jou wil hê, al bly dit ongesê. Jy leef steeds hier in my hart, elke keer as ek aan die klawers vat.”

Lucia beskryf die snit as lig en speels, maar ook eerlik en persoonlik.  “Ek het hierdie lied geskryf vir iemand wat glad nie weet hoe ek voel nie,” erken sy. “Ek is mal oor sing, en as ek van iemand hou, skryf ek sommer ’n lied daaroor.”

Sy voeg by: “Ek het op daardie stadium baie Coldplay geluister en sommer besluit ek wil daardie tipe musiek in Afrikaans skryf. Ek het iemand stil-stil bewonder en in daardie stilte het ek hierdie liedjie geskryf.”

Die resultaat is ’n melodie wat jou warm laat glimlag – amper soos verlief-wees self.

“Dis ’n song wat jy vir iemand kan stuur, self kan koester, of selfs op kan dans, want dit lig jou op!” sê Lucia.

“Hou van jou” is deur Lucia geskryf, met Jean-Marc Meyer as vervaardiger. Meyer was ook die agtergrondstem en het die vars, radiovriendelike klank help vorm.

Hou van jou is Lucia se tweede enkelsnit wat nou op radiostasies landswyd gehoor kan word.

Crescendo stel 4 uitsonderlike kunstenaars met unieke genres aan SA voor

Ná ’n week van opleiding deur van die bestes van die Suid-Afrikaanse musiekindustrie is die ATKV-Crescendo-musiekmentorskapprogram van 2025 tydens die ATKV-Crescendo GOUD-produksie afgesluit.

Daar is iets onbeskryfbaar dapper aan ’n kunstenaar wat sy of haar eie musiek skryf en aan die wêreld openbaar. Dit is soveel meer as woorde wat rym of melodieë wat harmoniseer – dit is ’n hartoopmaaksessie vir vreemdelinge om te maak of breek soos hulle wil.

Op 4 Oktober steek Salvador Mouers, Tamryn Paulse, Mark Pekeur en Lizl Simoes hulle vrese in hulle sak en ontbloot hulle siel aan die publiek. Darem nie alleen nie, maar in die gerusstellende teenwoordigheid van die briljante Crescendo-orkes, voormalige Crescendo-wenner, Petronel Baard, en The Voice South Africa-wenner, Craig Lucas.

Alhoewel verskillende genres, deel die nuutskeppinge van al die kunstenaars eienskappe van unieke outentisme wat op ’n meesterlike wyse deur regisseur Whaden Johannes met treffers soos “Lyfie”, “Timbuktu” en “Voshaarnooi” saamgestel en op ’n meesterlike voorsienigheid deur William Jacobs musikaal bymekaargevoeg is.

Benewens afronding aan hulle eie komposisies, is hulle deur die loop van die finale afrondingskool touwys gemaak in baie spesifieke aspekte van die vermaaklikheidsbedryf, onder andere die belangrikheid van publisiteit, die bepaling van kaartjiepryse, die kies en skryf van musiek vir die radio en die skep van ’n unieke kunstenaarsidentiteit.

Laasgenoemde was veral vir die kunstenaars van groot waarde. “Wanneer jy gemaklik is met wie jy is, word jou musiek nie die kern van jou menswees nie, en dit is nie die einde van die wêreld as jy ’n fout op die verhoog maak nie,” vertel Lizl, ’n musiekstudent en -onderwyseres van Pretoria.

As ’n ma van drie beaam Tamryn dat dit soms moeilik is om getrou te bly aan wie jy is. “Dit voel of ek met elke kind myself opnuut moet herontdek en herdefinieer. Ek wil deur my musiek graag aan mense toestemming gee om hulself te wees, eerlik te wees oor wie en wat hulle is. Nie bang te wees om hulself te wees nie.”

Salvador Mouers van Namibië moet homself so elke nou en dan nog knyp om seker te maak dat hy nie droom nie. “Wat is die kanse dat hierdie outjie van Narraville, Walvisbaai deel van hierdie projek geword het? Ek wil hê my musiek moet die boodskap dra dat ’n mens se komvandaan nie die einde van jou reis beteken nie. Dit is juis die struikelblokke uit my verlede wat my die krag gee om aan ander hoop te bring.”

Mark Pekeur van die Paarl vertel dat hy by ATKV-Crescendo sy familie gevind het. “Ek voel nie meer vreemd omdat ek nie soos die persoon langs my is nie. Ek het ’n uitlaatklep vir my emosies gekry. As ek kan verwoord wat iemand anders voel, het my musiek in hulle doel geslaag.”

So uniek soos hierdie kunstenaars se persoonlikhede, so divers is die genres waarin hulle skep.

“Die emosie op Tamryn, Lizl, Salvador en Mark se gesigte Saterdagaand sal my altyd bybly,” vertel Gerrie Lemmer, uitvoerende hoof van kultuur by die ATKV. “Die entoesiasme waarmee elkeen hulle liedjie opgevoer het en die blink musiekloopbaan wat op elkeen van hulle wag, verseker my dat ATKV-Crescendo daarin slaag om die Afrikaanse musiekbedryf volhoubaar van nuwe stemme en kunstenaars te voorsien.”

Morné van Staden, projekkoördineerder van ATKV-Crescendo, vertel dat die vier opnamekunstenaars deur die week verskillende vervaardigers ontmoet het. “Alhoewel daar aan elke musikant ’n begroting beskikbaar gemaak word, moet hulle self onderhandelings doen en die logistieke reëlings tref. Die Crescendo-familie is altyd daar vir raad en moed en ’n platform, maar die uiteindelike doel is om aan vier kunstenaars die vaardighede te gee om vanuit die staanspoor ’n suksevolle musiekloopbaan te kan hê.

“Deur die loop van 2026 sal hierdie vier kunstenaars se albums in afsonderlike konserte vrygestel word. Ons is meer as opgewonde om hierdie vier mense met hulle unieke talent en klanke aan die wêreld te gee.”

Die volledige konsert word op 10 Oktober 2025 op ATKV-Crescendo se YouTube-kanaal uitgesaai.

Vir meer besonderhede oor ATKV-Crescendo of hoe om vir 2026 se mentorskapprogram in te skryf, gaan maak ’n draai by www.crescendo.org.za. Kontak gerus vir Marlize Leyden per e-pos by marlize.leyden@outlook.com of stuur ’n WhatsApp-boodskap na 067 883 0077 vir onderhoude of meer inligting. 

ATKV-Crescendo se 2026-opnamekunstenaars is tydens die ATKV-Crescendo GOUD-produksie deur gaskunstenaars Petronel Baard en Craig Lucas aan die Suid-Afrikaanse publiek bekendgestel. Van links na regs: Salvador Mouers, Tamryn Paulse, Petronel Baard, Lizl Simoes, Craig Lucas en Mark Pekeur.

Edinia Citwa se soeke na liefde met “Jy’s my stil”

As wind oor my drome kom vee

en die wêreld my weer weeg

dan kom jy soos ’n fluister

tussen dinge wat ek nie kan sê.

Jy is die son in my winter

’n vuur sonder vlam.

Jy is die lig in my donker

’n stil soort bestaan.

Jy is die kalm in my storm

’n asem vol rus

’n lied in my twyfel

jy is my stil.

Met hierdie beeldryke woorde open die sanger en liedjieskrywer, Edinia Citwa (43) van Mosselbaai, haar nuutste enkelsnit, “Jy’s my stil”, wat vanaf 22 September op radiostasies landswyd gehoor kan word. Hierdie lied is haar tweede enkelsnit op die debuut-EP, met die titel, Gebore om te wen, wat vroeër vanjaar by die Daisy Jones-teater bekend gestel is.

Die liedjie is ’n intieme, persoonlike belydenis en herinner ons daaraan dat liefde nie altyd in groot gebare lê nie, maar dikwels in die stil, teenwoordige oomblikke saam met die mense wat die meeste saak maak.

“Die lirieke van ‘Jy’s my stil’ het gekom in ’n tyd toe ek self gesoek het na stilte en sekerheid,” vertel Edinia. “Ek het besef dat liefde nie altyd hard en groot hoef te wees nie – soms lê die mooiste deel van liefde in daardie stil oomblikke; in die teenwoordigheid van iemand wat net dáár is. Ek wou dit vasvang in beelde wat almal kan verstaan – die son in jou winter; kalmte in jou storm; ’n asem vol rus ... Dit daardie tipe liefde wat ek met die lied wou verwoord.”

Hierdie liedjie het Edinia, ’n ma van drie seuns, geskryf toe sy diep oor die soeke na liefde en gebroke liefde nagedink het. Sy het neergepen wat sy in die toekoms van die liefde verwag. “Ek sien uit na ’n tipe liefde wat geskoei is op stilte en kalmte. Ek wil hê almal wat dit hoor moet weggevoer word na stille ruimtes van liefde en sekerheid in die liefde,” sê sy.

Eddie Strings is in samewerking met die Crescendo-produksiehuis verantwoordelik vir die vervaardiging van die liedjie. “Eddie het dadelik verstaan waarna ek soek met die liedjie. Ek het na ’n klank gesoek wat sag en kalm is, en deurdrenk is met emosie.”

Edinia sê die ATKV-Crescendo se mentorskapprogram het nie net haar musiekloopbaan verander nie, maar haar lewe en karakter het gegroei. “Ek het baie introspeksie gedoen en het baie dinge in die proses oorkom. Dit was en is steeds ’n lewensveranderende ondervinding.”