Selby
Williams

Suid-Afrikaanse sanger en liedjieskrywer Selby Williams is gebore en getoë in Avianpark, een van die gevaarlikste en bende-geteisterde areas in die Worcester- en Wes-Kaap-omgewing. Ten spyte van hierdie nederige begin, het Selby nog altyd gedroom om eendag 'n impak nie net in sy plaaslike gemeenskap nie, maar ook in die wêreld, te maak.

 

As die tweedeoudste van vier kinders het hy baie tyd by sy ouma deurgebring. Wanneer 'n spesiale liedjie oor die radio gespeel het, het hy altyd saam met sy ouma gesing. Dit is waarskynlik waar sy liefde vir musiek begin het.

 

Ten spyte van groepsdruk in sy tienerjare het sy liefde vir musiek gebly. Nadat Selby verskeie sangkompetisies ontdek het, het hy besluit dat hy eendag die volgende John Legend wil wees.

 

Ná matriek het hy by 'n gemeenskapskunsorganisasie aangesluit wat hom gehelp het om sy musikale vaardighede te ontwikkel. Hy het die geleentheid gehad om ook oorsee sy musikale reis met gehore te deel.

 

Selby se deelname in die ATKV-Crescendo Mentorskapprogram in 2022 het nie net sy liefde vir musiek verder gevestig nie, maar vir die eerste keer het hy sy hand aan komposisie gewaag. In Augustus 2023 het hy sy debuutalbum Hier is ek vrygestel. In die proses het hy eerstehands ervaar hoe 'n kunstenaar sy eie musikale handelsmerk en fondasie ontwikkel. Sy nuutste musiekvideo Unhu hwangu, wat ’n Shona-vertaling van ubuntu is, is ’n maand later in September 2023 op alle stromingsplatforms vrygestel.

​

​