Lucia Poggenpoel verklap die paaie van haar hart

marlizeleyden8
7 days ago
2 min read

Updated: 5 days ago

ATKV-Crescendo-kunstenaar, Lucia Poggenpoel (33), het op 15 Augustus haar eerste debuutalbum, As jy val, by die Daisy Jones-teater buite Stellenbosch vrygestel. Saam met haar het Joshua na die reën, Jean-Marc Meyer en mede-Crescendokunstenaar Tauriq Claasen opgetree.

“Ek is baie trots op hierdie album. Dit het my 'n rukkie geneem om hierdie liedjies daar buite te kry,’” erken sy. “Ek moes deur soveel paaie van liefde, vreugde en hartseer stap. Hierdie snitte kom daarom direk uit my hart en ek prys die Here vir wat in my lewe gebeur het. Hy is die rede waarom ek nou in hoofletters voluit kan LEEF,” sê Lucia.

As jy val is die musikale vrug van haar deelname aan die ATKV-Crescendo-mentorskapprogram, waar sy haar stem en stories geslyp het tot liedjies wat lig en hoop bring. Sy vertel dat sy onmiddellik by haar mededeelnemers en die mentors van die program tuis gevoel het. “Dit het vir my gevoel of ek uiteindelik tuis gekom het. Die mense van hierdie program is omgeemense wat my tot hoër kreatiewe hoogtes geïnspireer het.”

DIE STORIES AGTER DIE LIEDJIES

As jy val: Hierdie snit is ’n gebed en verklaring in een. Dit vertel die verhaal van haar herstel na haar broer se dood. Sy was verpletter, maar kon deur musiek tot genesing verrys.
Hou van jou: Hierdie lied gaan oor die heimlike opwinding van ’n geheime liefde. Dit is lig en speels, maar ook eerlik. “Ek het hierdie lied geskryf vir iemand wat glad nie weet hoe ek voel nie,” lag sy. “Ek’s mal oor sing, en as ek van iemand hou, skryf ek sommer ’n lied daaroor.” Die resultaat is ’n melodie wat jou warm laat glimlag – amper soos verlief wees self.
Hoop vir ons mense: Lucia sing hierdie duet saam met Ghapi. “Die boodskap van hoop word hier op ’n groter skaal vir ’n land wat swaar trek weens die ekonomie en gebroke verhoudings. Ghapi is vir my so ’n sterk karakter. As hy hierdie liedjie saamsing, klink die lied soveel sterker en meer epies.”
Smoorverlief: Hierdie liedjie is ’n vrolike sokkietreffer wat Lucia se beste vriend geskryf het om sommer “lekker geraas te maak. Sy is opgewonde oor die refrein: “Smoorverlief, my skat, my lam – ek is mal oor jou.” Dit ’n liefdesverklaring op die maat van ’n dansbaan. Ons het gedink, as jy iemand wil sê jy is smoorverlief, doen dit só – met ’n mooi melodie wat almal saam kan sing,” verduidelik Lucia.